اضغط هنا

تقبل الله من ومنكم صالح الأعمال

السلام عليكم ورحمة الله وبركاته
تقبل الله منا ومنكم الصيام والقيام وصالح الأعمال
ده كان اولا
أما ثانيا فعندى شوية أخبار حلوة

انتهيت من تسجيل أغنية جديدة اسمها "لا يا قلبى" وان شاء الله هتسمعوها يوميا على إذاعة نجوم إف إم من أول يوم العيد وعلى النت كمان من نفس التاريخ
الأغنية كلمات: الشاعر صلاح جلال

ألحان: محمد الصاوى توزيع: طارق حسيب
تسجيل وميكساج: استوديو "فور" م سامح المازنى

جيتار(سبانيش وإليكتريك): مصطفى أصلان

طبلة: احمد عيادى

مستمر فى تجهيز وتسجيل باقى أغانى الألبوم


منتظركوا فى حفلة 21 اكتوبر فى ساقية الصاوى قاعة الحكمة الساعة 6.30 مساءا
والموعد المرة دى بدرى شوية عشان كان فيه ناس كتير بتشتكى ان مواعيد الحفلات بتكون متاخرة فخليناها بدرى شوية



نزلنا فيديوهات على المدونة وعلى الفيس بوك وعلى اليوتيوب ادخلوا اتفرجوا عليها
http://www.youtube.com/user/elwaadmostafa

http://www.youtube.com/user/wwwmostafamahmudcom

http://www.youtube.com/user/mmkart

http://www.new.facebook.com/video/video.php?v=1042727103192&oid=31303994135

كل سنة وانتوا طيبين

مصطفى محمود

برنامج أنغام

برنامج أنغام

الجزء الأول

الجزء الثانى

الجزء الثالث

أغنية بعد الصمت من حفلة 19/8 بساقية الصاوى

بسجل ألبوم جديد وعايز أفكاركوا وآراءكوا واقتراحاتكوا

السلام عليكم ورحمة الله وبركاته

بعد كل عام وانتم بكل خير ويارب نكون كلنا من عتقاء ربنا من النار فى رمضان

أما بعد....

أنا بسجل ألبوم جديد وعايز أفكاركوا وآراءكوا واقتراحاتكوا

ولو حد عنده فنان عايزنى أتعامل معاه فى الألبوم يبعت يقوللى هنا فى المدونة أو على الميل

elwaad2002@hotmail.com

منتظركوا

مصطفى

ده جزء من بروفة مع فرقتى كانت ليلة حفلة 27 يوليو اللى كانت فى الساقية وده كان فى استديو بروفات اسمه دابل فيجن

videos..videos..videos 1

السلام عليكم ورحمة الله وبركاته
معلش غبت عليكم كام يوم بس ده كان لثلاث أسباب
أولا : كان عندى رغبة أعرف رأيكوا فى موضوع إشراك البنات فى الفريق الجديد
ثانيا : أنا كنت مشغول جدا وفعلا ما كانش عندى وقت أركز واكتب حاجة جديدة
ثالثا : حاجة كوميدية موت ...إيه بقه ؟؟؟
بقى التليفون عطلان عندى فى البيت بقاله كام يوم ..يعنى من قبل الأجازة الفظيعة المريعة الشنيعة اللى مصر كلها خدتها ولا كأننا اتقدمنا واتحضرنا وأنتجنا وتعبنا وهلكنا من الشغل ومن حقنا بقه نستريحلنا تمانين يوم أجازة غصم واقتداركده ...والله حاجة تغيظ
المهم عملت كل المحاولات إنى أجيب حد يصلحلى التليفون أبدا ما يحصل
طبعا بعد الموظفين والعمال البهوات العظماء الشقيانين التعبانين ما فاقوا ورجعوا من مارينا والساحل وحنوا علي الشعب الغلبان واللى كان واخد هو كمان نفس الأجازة العظيمة دى بعد ما رجعوا حنوا عليّ وجم عشان يصلحولى التليفون وأكتشف المفاجئة المفجعة إيييييه هى
البغبغانات الجميلة اللى فى غلاوة بلال وحمزة بالنسبة لمراتى واللى احنا حطينهم فى البلكونة اليومين دول اتبرع منهم واحد وقال يوفر عليّ جزء من فواتير التليفون ويرحنى من وش المكالمات وراح واكل جزء من سلك التليفون وقطعه واكتشفت إن هو ده سبب قطع حرارة التليفون وبالتالى الدى اس ال وطبعا لو كنت أعرف المعلومة دى من يومها كنت صلحته فى ثانية بس النصيب بقه
المهم إن الميه رجعت لمجاريها وادينا من تانى عدنا لبعض
مبدئيا تعليقى على كلامكوا فى موضوع الفريق ده هيكون بسيط جدا
قبل أى حاجة أحب أشكر كل واحد قال رأيه بشكل متحضر ومحترم وكلكم لكم منى جزيل الشكر والاحترام مع إنى مختلف مع كتير من الآراء بس أنا سعيد بشكل النقاش ده بس كان نفسى واحد بس يقوللى دليل من الدين من الشرع قال الله قال الرسول قال العلماء(حتى اللى قال إن القرضاوى أباح المسألة دى تطوع من عنده وقال إن الحالة اللى أباح فيها غناء البنات مختلفة مش عارف مختلفة فى إيه هى ميس شلش المنشدة الأردنية فيها حاجة زيادة عن البنات فى مصر اللى نفسهم يقدموا فن هادف ووقور ومحترم) إنما للأسف مازلنا بناخد تشريعنا من اللى احنا اتعودنا عليه مش من الشرع نفسه إنما ياللا معلش بكرة أحلى من النهاردة
القرار الأخير بالنسبة لى إنى مش ناوى أشرك بنات فى الفريق وده ليه أسباب كتير منها آرائكوا اللى قلتوها
أما اللى جاى إن احنا هنبدأ بروفات وسيظل الباب مفتوح لأى حد عايز يشارك فى الفريق إذا كان بيغنى أو بيعزف أى آلة موسيقية
معلش طولت عليكوا أشوفكوا فى موضوع آخر

تفاصيل أكتر عن فريق الإنشاد الجديد
اتفرجوا على الفيديو ده

ممكن الموافق والمعارض يقوللنا ليه

ممكن يا جماعة الموافق على وجود البنات فى الفريق يوضح هو موافق ليه واللى معارض يوضح برضه هو معارض ليه

آخر أخبار فريق الإنشاد الدينى

السلام عليكم ورحمة الله وبركاته
نوافيكم بآخر أخبار وتطورات فريق الإنشاد الدينى الذى أكونه
أولاً : اتصل بيه مجموعة من الشباب والبنات اللى عايزين يشتركوا فى الفريق وقابلتهم كلهم وسمعتهم ولقيتهم كلهم تقريباً أصواتهم حلوة وأخبرتهم إنى هبلغهم مع أول بروفة للفريق.
ثانياً : تم الإتفاق مع ساقية عبد المنعم الصاوى على تقديم الدعم اللازم للفريق من توفير أماكن لبروفات وتدريبات الفريق و إقامة الحفلات دورياً على مسارح الساقية بشكل أساسى وده طبعا غير إنى ناوى نعمل حفلات فى أماكن تانية كتير بس الساقية بتكون كويسة كبداية وانطلاقة للفريق.
ثالثاً : تم الإتفاق مع الدكتور محمد عبد الستار وهو دكتور فى معهد الموسيقى العربية ومتخصص فى تدريب الأصوات الغنائية إنه يتولى تدريب الفريق وده هيتيح فرصة ممتازة لأعضاء الفريق لإنه هيدربهم بشكل احترافى هيرفع من قدراتهم الصوتية جدا.

وبكده تقريباً أكون انتهيت من أساسيات الفريق وباقى إننا نبدأ تدريبات ومازال الباب مفتوح للى عايز يسجل إسمه معايا إنه يكلمنى على التليفون
0101008476

حاجة تانية أنا لسة ماحددتش اسم للفريق فأرجو إنكوا تشاركونى التفكير فى إقتراح اسم للفريق بس يكون خفيف وسهل ومش مجعلص
اللى عنده مجموعه من الأطفال بيعملوا استعراضات ويحب يشركهم فى الحفلات ويكون نشاط هادف وممتع ليهم برضه يكلمنى هتكون حاجة ظريفة
بالمناسبة أنا لم أستقر تماماً على إشراك البنات فى الفريق وأرجو منكم المشاركة فى الإستفتاء الموضوع على ناصية المدونة وانت داخل على إيدك الشمال وقولولى رأيكم الشخصى و اللى بيكون من الأسس الأساسية اللى ببنى عليها قراراتى

اعرف المزيد عن فريق الإنشاد الدينى

أخبار حفلاتى

إن شاء الله سوف أقيم ثلاث حفلات فى آخر يونية ويوليو وأغسطس بساقية الصاوى ومواعيدهم بالتحديد قريبا على المدونة
أقيم حفلة شم النسيم فى نادى دريم لاند يوم شم النسيم بإذن الله ,دخول الحفلة مجاناً.

مجموعة صور أخرى لحفلة 21 مارس بساقية الصاوى

بعض صور حفلة 21 مارس بساقية الصاوى

دى بعض صور الحفلة بس بكل أسف إن المصور اللى كان بيصور حصل له ظروف فى أوائل الحفلة واضطر إنه يمشى من الحفلة ومن غير ما يبلغنى فللأسف فيه فقرات وضيوف كتير ماتصورتش ودى بعض الصور اللى صورها

الفيديو فى الطريق

أدخل حالا وقوللى رأيك فى الحفلة بالتفصيل الممللللللللل

أدخل حالا وقوللى رأيك فى الحفلة بالتفصيل الممللللللللل

ده إذا كنت حضرت

أما لو ماكنتش حضرت ....فاستغفر ربنا يابنى وانوى نية صادقة على حضور الحفلة إللى جاية فى الساقية فى أول مايو إن شاء الله

الصور والفيديوهات والأغانى بعد يومين ان شاء الله لأنى راجع مييييييييت ولازم أناااام واشبع نووم

السلام عليكم ورحمة الله وبركاته

GUEST BOOK

قررت نبدأ واستعنا عالشقا بالله

قررت أبدأ مشروع جمع فائض الطعام وتوزيعها على الفقراء

أيوة قررت أبدأ ...ازاى وهاعمل إيه بالظبط والخطوات إيه تحديدا لسه مش عارف بالظبط إنما انتوا اللى هاتقولولى وعشان كده فكرت إنى أكتب تليفونى هنا(وبالمناسبة أنا تليفونى مكتوب على كل الشرايط وكروت الفرقة يعنى مش غريبة إنى أكتبه على النت) واللى عايز يساعدنى بأى حاجة..وبكرر أى حاجة أو فكرة أو اقتراح أو علاقة بشخص هايفيدنا أو أى حاجة تانية أنا مش عارفها دالوقت ,اللى يحب يشارك هايكلمنى فى التليفون وانا هارتب موعد اجتماع اسبوعى ونقعد نرتب كل التفاصيل ونبدأ نشتغل إن شاء الله

تليفونى
0101008476

للى مايعرفش أنا بتكلم على إيه

أنا بكون جمعية خيرية رسمية وقانونية هدفها جمع بواقى أو فائض الأطعمة من الفنادق والمطاعم والنوادى والعزومات الكبيرة وأى مكان وتوزيعها على الفقراء
للمزيد
الموعد على التليفووووووووون يا رجالة

بتغنى..صوتك حلو...بتعزف أى آلة موسيقية..تعالى

السلام عليكم ورحمة الله وبركاته

أيها الفنانين والفنانات

الموضوع ببساطة شديدة إنى أنا طول عمرى بيجيلى وبتعرف على شباب مواهب كويسة جدا وبكون نفسى أوجد لهم سكة ينموا فيها مواهبهم ويمارسوا فيها الفن بشكل محترم وللأسف مش بالاقى كتير اقتراحات اقترحها عليهم

وفى نفس الوقت نفسى أعمل عمل مفيد للشباب الموهوبين دول ومفيد للمجتمع اللى محتاج يستمتع بالمواهب دى وبشكل محترم واكون بكده بساعد على احياء الفن الهادف أكتر واخرج كوادر شباب موهوبين كل واحد يشق طريقه فى الفن بعد كده زى ماهو عايز

المهم

انا بكون فريق إنشاد دينى الإنشاد الدينى بمفهومه الواسع واللى عايز يفهم قصدى إيه يسمع أغانيه وهو يفهم وجهة نظرى

المهم الفريق ده هيكون فريق كبير يعنى يستوعب أكبر قدر ممكن من الشباب(واحتمال البنات لسه بفكر)الكبار والصغار

الفريق هيكون تطوعى صرف يعنى اللى هيشترك فيه مش هاياخد أى أجر(فلوس يعنى إنما أجر ربنا محفوظ طبعا)وهنبدأنعمل بروفات ونتدرب وبعد كده أنظملهم حفلات ونعرض فى أماكن كتير

أنا بكتب بسرعة عشان مستعجل ...ماعلينا

إللى يحب يشترك يتصل بيه على تليفونى ده

0101008476

طبعا الإعلان ده للى بيغنوا واللى بيعزفوا أى آلة موسيقية....ياللا منتظر اتصالاتكوا

بالمناسبة أنا لسه ما قترحتش اسم للفريق اللى عنده اقتراح لإسم يبعتهولى

guest book

ده زى ما تقول كده يعنى

سجل لزوار المدونة

أو أوتوجراف أو كشكول إهداءات أو أودة الضيوف أو... أى حاجة يا عم .. المهم

اتفضل اكتب فيه كلمة كلمتين تلاتة انت حر بس اكتب

ألبوم الصور