Monday, May 5, 2008


السلام عليكم ورحمة الله وبركاته
معلش غبت عليكم كام يوم بس ده كان لثلاث أسباب
أولا : كان عندى رغبة أعرف رأيكوا فى موضوع إشراك البنات فى الفريق الجديد
ثانيا : أنا كنت مشغول جدا وفعلا ما كانش عندى وقت أركز واكتب حاجة جديدة
ثالثا : حاجة كوميدية موت ...إيه بقه ؟؟؟
بقى التليفون عطلان عندى فى البيت بقاله كام يوم ..يعنى من قبل الأجازة الفظيعة المريعة الشنيعة اللى مصر كلها خدتها ولا كأننا اتقدمنا واتحضرنا وأنتجنا وتعبنا وهلكنا من الشغل ومن حقنا بقه نستريحلنا تمانين يوم أجازة غصم واقتداركده ...والله حاجة تغيظ
المهم عملت كل المحاولات إنى أجيب حد يصلحلى التليفون أبدا ما يحصل
طبعا بعد الموظفين والعمال البهوات العظماء الشقيانين التعبانين ما فاقوا ورجعوا من مارينا والساحل وحنوا علي الشعب الغلبان واللى كان واخد هو كمان نفس الأجازة العظيمة دى بعد ما رجعوا حنوا عليّ وجم عشان يصلحولى التليفون وأكتشف المفاجئة المفجعة إيييييه هى
البغبغانات الجميلة اللى فى غلاوة بلال وحمزة بالنسبة لمراتى واللى احنا حطينهم فى البلكونة اليومين دول اتبرع منهم واحد وقال يوفر عليّ جزء من فواتير التليفون ويرحنى من وش المكالمات وراح واكل جزء من سلك التليفون وقطعه واكتشفت إن هو ده سبب قطع حرارة التليفون وبالتالى الدى اس ال وطبعا لو كنت أعرف المعلومة دى من يومها كنت صلحته فى ثانية بس النصيب بقه
المهم إن الميه رجعت لمجاريها وادينا من تانى عدنا لبعض
مبدئيا تعليقى على كلامكوا فى موضوع الفريق ده هيكون بسيط جدا
قبل أى حاجة أحب أشكر كل واحد قال رأيه بشكل متحضر ومحترم وكلكم لكم منى جزيل الشكر والاحترام مع إنى مختلف مع كتير من الآراء بس أنا سعيد بشكل النقاش ده بس كان نفسى واحد بس يقوللى دليل من الدين من الشرع قال الله قال الرسول قال العلماء(حتى اللى قال إن القرضاوى أباح المسألة دى تطوع من عنده وقال إن الحالة اللى أباح فيها غناء البنات مختلفة مش عارف مختلفة فى إيه هى ميس شلش المنشدة الأردنية فيها حاجة زيادة عن البنات فى مصر اللى نفسهم يقدموا فن هادف ووقور ومحترم) إنما للأسف مازلنا بناخد تشريعنا من اللى احنا اتعودنا عليه مش من الشرع نفسه إنما ياللا معلش بكرة أحلى من النهاردة
القرار الأخير بالنسبة لى إنى مش ناوى أشرك بنات فى الفريق وده ليه أسباب كتير منها آرائكوا اللى قلتوها
أما اللى جاى إن احنا هنبدأ بروفات وسيظل الباب مفتوح لأى حد عايز يشارك فى الفريق إذا كان بيغنى أو بيعزف أى آلة موسيقية
معلش طولت عليكوا أشوفكوا فى موضوع آخر


5 comments:

أنا حر said...

عودا حميدا يا فنان

واحشنا مووووووووووت

عايزين نبدأ بقا الشغل

احنا نشفنا خلاص

حمدلله بالسلامة وابقا خلي بالك المرة الجاية احسن ياكلو التليفون نفسه

حامد حلمي said...

المفروض انك كمان تصرف علاوة 30% للبغبغان عشان ريحك من التليفونات و انتج طبعا العطل الفظيع دا

حامد حلمي said...

قبل ما انسى الرابط مش شغال بتاع الفيديو

mohammed alsha3r said...

عودا حمبدا بافنان ونورت الفيس بووووووووووووك

خلينا بقى نشوف الجديد بتاعك هناك كمان

وبالتوفيق يارب وعاوز اشوفك قريب يافنان

Anonymous said...

اه الجديد
بقالنا كتير مستنين الدجيد دا لحد ما بقينا متاكدين انو مش هيجي ابداء
زي صلاح الدين دلوقتي اللى احنا مستنينه يحرر لنا الاقصي

يلا كلها احلام