انا الحقيقة بقالى كتير شاغلنى جدا موضوع فوز المنتخب والإنجاز اللى حققه فى الدورة الأفريقية وتفاعل الناس فى الشارع وفرحتهم العارمة وخروجهم للشوارع وعندى خواطر كتير عن الموضوع
ومسألة حب الوطن والوطنية والنجاح فى الحياه وحاجات كتير موت
ربنا ييسر واقدر أصيغها فى موضوع لعله يكون فيه إضافة لبعض الناس
إنما الليلة دى كنت فى فرح محمد غزلان وكان فرح جميل والناس اتبسطت أوى وظبطناه أحلى تظبيطة والحمد لله
ربنا يباركلك يا"غز" انت وعروستك ويسعدكوا
فى الدنيا والآخرة يارب
و بارك الله لكما وبارك عليكم وجمع بينكما فى خير
على فكرة لسة ما جتش للموضوع اللى عايز اتكلم فيه
الموضوع بقه إن الأكل فى الفرح كان جامد موت وبعد الفرح لقيت فيه أكل كتير فاضل وطبعا نظام الفنادق إن الأكل ده بيترمى فى الزبااااالة........أيييوة فى الزبااالة
فرحت رايح لوالد العريس وقلتله ياريت تقول للمتر بتاع القاعة اننا ناخد الأكل الفاضل ونتصدق بيه ,المهم الرجل كان متعاون جدا ووضع لنا الأكل فى علب وأكياس وأخدناه ولفينا بعد الفرح ووزعناه كله عن بكرة أبيه...أى والله أبيه
أقوللكوا تقريبا كام علبة كبيرة كانت مليانة تورتات و جاتوهات وحلويات وكباب وكفته و لحوم وفراخ ومحاشى والذى منه ؟؟؟؟؟؟
تقريبا 30 علبة كبيرة و 5 شنط بلاستيك كبيرة جدا مليئة بالفاكهة ومش أى فاكهة يا معلم..تفاح أحمر وأخضروأصناف أخرى , وده طبعا غير الأكل اللى ماعرفناش ناخده زى أم على حبيبتى والفروت سالاد والسلاطات واللى مالحقناهوش قبل مايترمى (طبعا أنا جريت ريقكوا موت) عارفين ده أكل ممكن يأكل كام واحد تقريبا ؟؟؟؟؟؟؟
مش أقل من مئة إنسان .....معلش بالراحة كده عشان نستوعب المعلومة ممكن مئة إنسان ياكلوا الاكل اللى كان هايترمى فى الزبالة
طبعا اللى باقولهولكوا ده مثل صغير جدا جدا جدا جدا على كمية الأكل اللى بتترمى فى الزبالة يوميا فى الفنادق والمطاعم والعزومات وما شابه الموجودة فى مصر
انتبهوا..الفندق فيه قاعات أفراح ومطاعم وغرف الفندق نفسه ولامؤاخذة نايت كلابات وديسكوهات(ماهو الناس دى بتاكل لحمة ورز وطبيخ جنب البيرة والخمرة) يعنى ممكن الفندق الواحد يطلع كميات أكل مهولة يوميا خلال الـ24 ساعة من على الأقل على الأقل عشر او عشرين مكان ومطعم ووالله مستحيل تتخيلوا الكميات ممكن تكون عاملة ازاى ..أنا قاللى مرة مدير الأغذية والمشروبات بفندق شبرد أنا ممكن أملالك "كونتينر" يوميا أكل بس نجيب موافقة من إدارة
بالمناسبة هو ده الكونتينر
القاعدة فى الفنادق إن الأكل ده مصيره الزبالة
طبعا كلنا عايشين فى مصر العظيمة اللى نسبة الناس اللى مش لاقية تاكل فيها أكتر بكتير من اللى لاقية
طيب.. وصلت الفكرة؟؟
دىحاجة بسيطة كده يا رجالة
الفكرة إن الفجوة بين فائض الأغنياء واحتياج الفقراء مرعبة
يعنى ناس بترمى الأكل فى الزبالة (ومش أى أكل يا معلم ..سموك سالامون و سيمون فيميه وديوك رومى وأصناف والله مابيخطر على بالى إنى أروح أشتريها وأكلها فى بيتنا) وناس مش لاقية العيش الحاف
بالمناسبة اللى ماشافش ناس قبل كده مش لاقية العيش الحاف بجد أو بتاكل من الزبالة يقوللى وانا أوريله بالهبل ...ابتسم نحن فى مصر المسروو...أه ..المحروسة
أنا عشان بشتغل فى الأفراح بشوف كميات الأكل المرعبة فى الفنادق اللى بتترمى
طيب أنا عايز إيه من الكلام ده؟؟؟
عايز حاجة خاصة وحاجة عامة
الحاجة الخاصة
أرجوكوا ماترموش أكل فى الزبالة واعرفوا إن حسابنا هايكون عسير على الأكل اللى بيترمى ده والقليل زى الكتير يعنى باتكلم عن بواقى الأكل اليومى فى بيوتنا وبواقى البوفيهات فى أفراحنا وفى عزوماتنا بالأخص فى رمضان اللى العزومات فيه بالهبل
الحاجة المهمة بقه إن
أنا عندى حلم...
إنى أعمل جمعية خيرية أو أيا كان اسمها بس تكون كيان كامل وظيفته إنه يجمع الأكل من الفنادق والمطاعم والعزايم الكبيرة وما شابه ويوصلها للفقراء
الكيان ده حلم حياتى والشئ اللى بشعر إن المجتمع فى أمس الاحتياج ليه
عربيات وموظفين واتفاقات مع الأماكن دى وآلية لتوصيل الأكل للفقراء وتفاصيل كتير فى دماغى نفسى ألاقى اللى يساعدنى و يحمسنى أكتر ونتعاون مع بعض وأحقق حلمى
اللى عنده أى شئ يفيدنى فى الموضوع ده من أول أفكار لغاية أى شئ يخطر ببالكوا يدخل يقوللى
وغير كده عايزين ننشر الفكرة دى فى كل دوايرنا وعلى كل المستويات ,فكرة إن بواقى الأكل اللى احنا مش عايزينها ممكن تكون شئ غالى جداجدا لناس كتير غيرنا
ومنتظركوا....
18 comments:
السلام عليكم و رحمة الله و بركاته
استاذي الغالي / مصطفى محمود (ربنا يحفظه ) و يطول في عمره
مش عارف اقول بجد ايه لحضرتك؟ و الله و من غير ايمانات تانية انتي سبقتني في الفكرة - بس زي ما بيقولوا " سبقها بها عكاشة "... و طبعا ربنا يخليك هنقولها هنا " سبقكك بها استاذك مصطفى محمود "- و دة الطبيعي .
المهم من غير ما ارغي كتير لحضرتك
حاجة زي اللي حضرتك بتقولها دي محتاجة مجهود فوق المجهود .... بس زي ما بيقولوا ايد لوحدها متسقفش و محتاج كمان ايجابية عالية جدا .
و انا بجد نفسي كان عمونا "بلوج سبوت" يوصل انحناءة تقدير مني لحضرتك على موقفك مع صاحب الفرح .
و الموضوع تفكير على مية بيضة ترتيبات جامدة .
وانا عارف ان حضرتك بتاع الحاجات الجامدة
و كمان ما تنساااااااااش .... احنا في مصر
يعني مش كل حاجة حلوة بتستنى
اوك .. هو يمكن تسرع منى انى اتدخل كده .. بس لو ليا حتى لو شبه دور فى الموضوع اللى حضرتك بتفكر فيه ..هاكون سعيد جدا
العنوان ساعدونى احقق حلم كبير .. و انا نفسى اعرف نساعد حضرتك ازاى او بمعنى اصح كلنا نساعد على تحطيم الفجوة دى او على الاقل تضييقها .. ازاى؟
حلو جدا
ابتدينا نلاقى أعوان اهه
مية مية يا رجالة
موعدنا قريبا جدا
مصطفى الفكرة موجودة فى حاجة فى مصر اسمها بنك الطعام بيقوم بالعمل ده و مديرة التسويق فيه انا اعرفها شخصيا و كانت تعمل معى فى الاى ار تى زمان و اسمها اغاريد امين و لو محتاج تليفونها للتنسيق كلمنى و انا ابعتهولك
ربنا يتقبل منك جهدك
نقطة تانية خالص بقى ...اعرف ان ده فرح غزلان من سياق كلامك ....موش هستم علشان موش اخلاق الثقب اننا ننشر مشاكلنا على الملا و بنحلها دايما داخل مجلس ادارة الثقب ....محتاج تبرير لانى معرفشى بالفرح غير دلوقتى بس لو سمحت ....
السلام عليكم
هيه فعلاً فكره جميله وعمل رائع وخصوصاً أن الفقراء حيكلوا حاجات عمرهم في حياتهم مايفكروا أنهم يأكلوها في يوم من الأيام فتخيل مدى سعادتهم عندما يأكلوها ومن غير ما يمدوا إيدهم لحد وياريت كان فيه شيء أقدر أساعدك بيه عموماً لو لقيت لي دور معاك في هذا المشروع لا تتردد في أن تطلبه مني بس يكون يلائم ظروفي
وربنا يوفققك لعمل الخير
استاذ مصطفى بجد جزاك الله كل الخير على الفكرة الجميلة والخيرية دي وربنا يكرمك بإذن الله في تحقيق حلمك وفكرتك واكيد هتابع كل خطوات الموضوع من هنا وربنا معاك .. ويجزيك عنها كل الخير ..
الحدوتة دي كنت بشوفها أيام ما كنا قاعدين في الإمارات ومش محتاجة اقولكو الأفراح هناك......يختييييي ع الأكل ويا فرحة قلب القطط والكلاب الضالة
هنا ف مصر بأه أكيد الموضوع ده مش بالبشاعة اللي بره انما موجود،، وعلى هذا فإني ومن موقعي هذا بقولك على بركة الله بس فكرلها صح النح كوانح.. عشان انت أكيد في مصر
ده مش إحباط والله انما بنورك وبجد ربنا معاك بس انت قول بسم الله
يا جماعة والله أنا سعيد جدا بتشجيعكم
وده بيدينى أمل إن حلمى هايتحقق
أبو عمر
دى مشكلة غزلان مش مش تقصيرى ومشكلة القسم الإعلامى بالثقب الأسود
أما البنت اللى بتقول عليها إبعتلى تليفونها على الموبايل بس أنا أعرف إن بنك الطعام مابيجمعش بواقى طعام إنما بيجمع طعام غير مطهى (مطبوخ يعنى) وحتى لو بيعمل اللى أنا عايزه فأنا أظن إننا محتاجين مليون بنك طعام عشان يسد الثغرة دى
أم خالد,مها ميهو,عاشقة القمر
سعيد بمشاركتكوا ولو فيه حاجة تقدروا تعملوها هاقوللكوا
للجميع
خلوا بالكوا
عايزين ننشر الفكرة على كل المستويات
جايز ناس تانية تتشجع وتعمل الكيان ده واحنا ناخد الثواب
بص يا مصطفى الأفضل انك فعلاً تنسق مع بنك الطعام المصري وهم ليهم جهد طيب جداً وعاملين شغل حلو قوي
بس انا عاجبني ان خطابك تطور وبقيت تتكلم عن "الفجوة الهائلة" بين الأغنياء والفقراء وأثرها على البنيان المجتمعي . . نقول ايه؟! مثقف والله يا بني من يومك
علي فكرة الفكرة دي جامدة
بس صعب تكون جمعية
بس مش مستحيل
لكن محتاجها مجهود
يومي فظيع
عشان توزع الحاجه قبل ما تبوظ عندك
ومحتاجه اعداد يكونوا فى الجمعية
وعربيات كمان
بس فكرة حلوة وخير كبير جدا
امتي هتفتح موقعك
انا لقيته مفتوح فى مرة بس كان فاضي خالص وبعدين لقيته اتقفل تاني
موقع العبدلله انت كاتبه عندك فى المدونه
عمو مصطفى...الموضوع فكرته جامدة اوي جدا خالص..بس هو فعلا عايز مجهود رهيب..وعايز مجموعة كبيرة والكل فيها متحمس وعارف قيمة اللي بيعمله وفاهم قد ايه مهم وليه ثواب كبير..وعايز تخطيط دقيق..ناس مهمتها تجيب اسامي الفنادق والمطاعم الكبيرة وناس تروح تتفق وتعرف وتتكلم وتقنع وناس تعمل احصائية احنا شغلنا هيبقى مع انهي ناس وهما موجودين فين "اللي احنا هنساعدهم يعني"وناس شغلها تغلف الاكل بشكل تمام وناس تنزل توزع وناس وناس وناس
الموضوع كبير بس هيبقى روح الشغل في حلوة اوي وخصوصا لو حسينا بنجاح فيه مع كل وجبة بتروح لحد محتاجها بجد بعد ماكانت بتترمي في الزبالة
عمو مصطفى...حضرتك عمو كفاءة اوي
وعلى فكرة قول بسم الله نبدأ وكلنا هنبقى معاك بس انت قول بسم الله
وماتقولش طب نأجل الموضوع لحد ما الاقي الناس ولحد وما اشوف ولحد مامش عارف ايه...لا قول يلا نبدأ بكرة والناس هتلاقيها موجوده ويوم عن يوم بتزيد
واديني سجلت اسمي في الليست بتاع فريق العمل..وكلنا معاك يا كوتش
أصصصصلى يا رجالاة
والله يا ميرو كلامك إدانى أمل كبير وحمسنى جدا
متفائل خير جدا
بس برضه عايز تفاصيل أكتر وناس أكتر
يا مسهل
السلامو عليكو
ازيكم كلكم
عاملين ايه
انا جاية اسلم
واقولك انو الفكرة جامدة اوي علي فكرو
انت تعرف لو اتفقت مع كل جمعية خيرية وقولتلهم علي الفكرة وينفذوها هما
يعني كل جمعية وكل نادي يعملها هوا فى المنطقة عندو
زي نادي الصيد جمعية الابرار فى المهندسين مثلا
ولا جمعيات صناع الحياة
كذا المجهود هيكون اكبرو اوي
ايه رايك بقا فى فكرتي
اكيد جامدة
صح
مستنيه رايك
انت هتعمل حفلة تانيه فى الساقية
؟
عجبوني اوي الصور اللى فوق علي المدونه بتاعتك
فكرة ممتازة ونبدأ فيها من الآن
انشروا الفكرة فى كل مكان
أما بالنسبة للحفلة
يا جماعة هو الإعلان اللى على الهيدر مش واضح
الحفلة اللى جاية يوم الجمعة 14 مارس الساعة 7 مساءا بساقية الصاوى
اكتشفت ان 14 مارس مباراة الأهلى والزمالك فهغير موعد الحفلة وابلغكم
آسف على اللخبطة
جزاك الله خيرا
ودا لينك بنك الطعام ومساعدات اخرى
افتكر انه هيساعدك كتير ويساعدك كل الناس للى بتحب الخير
http://egyptianfoodbank.com/
ارجو الاهتمام
اللهم وفقنا لما تحبه وترضاه
يلا يا تيفا احنامعااااااااك يا نجم النجوم الزاهقة
وهنساعد فى جمع بيوت محتاجين & استغلال بواقى مطعم البرنس الى ممكن تأكل امبابة كلها يوميا
واظن البرنس مش هيمانع
صديقي الغالي مصطفى
عرفت مدونتك قدرا من عند اسلام لطفي
بالنسبة للفكره دي اعتقد انك بدل ما تأسسلها جمعيه جديده يمكنك التنسيق مع جمعية قائمة بالفعل و لها شهره حيث ان الشهره دي هاتسهل الاتفاق مع الفنادق و المطاعم زي جمعية مصطفى محمود او رسالة او صحبة خير
خالص تحياتي و اشواقي الطيبة
و قبل ما حد يزعل مني انا ما عملتش فرح .. كانت حفلة عالضيق في بيت العروسة و زفة عربيات و خلاص
Post a Comment