يعنى هنكون ممنونين لوحد يعنى خد الحتة دى "كوبى بيست" عنده فى مدونته,موقعه,على حيطة بيتهم أى حتة والسلام..يعنى هتكون مساعدة من الإنسان.. لأخوه اللى هو الإنسان برضه (زميله فى البشرية يعنى) ولاهى الإنسانية إنعدمت فى الزمن ده..تخيل تساعد المحتاجين بــ "كوبى بيست" إيه الحلاوة والبساطة دى؟؟
ياللللا يا حبيبى
ياللللا يا بابا..شكة دبوس
كووووووبى....بييييييست....هييييه شفت بسيطة ازاى....حسيت بحاجة...شطووووور
تشكر يا ذوق يا أمير يابن اللللل أمرا..ماتخافش نسبتك محفوظة..فى الثواب ماتفهمنيش غلط
بإذن الله هعمل حفلة يوم 21 مارس فى ساقية عبد المنعم الصاوى
و21 مارس ده يعنى يوم عيد الأم وكمان هيكون تانى يوم المولد النبوى الشريف وده معناه إن احنا أكيد هنحتفل ونقدم بعض الأغانى الخاصة بالمناسبتين المولد النبوى الشريف وعيد الأم وده طبعا جنب البرنامج الطبيعى اللى بقدمه
الحفلة هاتبدأ الساعة 8 مساءا أما هتنتهى امتى ؟ ماوعدكوش أنا بفضل أغنى لغاية مايقولولى فى "الساقية" روّح يا عم مصطفى احناعندنا عيال وعايزين نروح لهم
طبعا كالعادة معانا فقرتين أساسيتين بكون حريص دايما على وجودهم
الفقرة الأولى استضافة الشاعر المبدع الأستاذ صلاح جلال عشان يمتعنا بأشعاره الجميلة واللى أكيدهيكون مركز فيها على المناسبتين اللى بنحتفل بيهم
الفقرة التانية هى أكثر من فقرة بأقدم فيها أصوات أخرى من فريق الوعد والنورس وأصوات أخرى تستحق إنها تتسمع ونستمتع بيها وبنتهز فرصة الحفلات إنى أقدمهالكم
سعر التذكرة هيكون عشرة جنيه و ده زى ما اتفقنا الحفلة اللى فاتت مابيجيبش كومبو عند مؤمن يعنى ...حاجة ببلاش كيده
وبالمناسبة احنا لسة بنحتفل بعيد ميلاد "فريق الوعد" العاشر بس المرة دى مش هنجيب تورتة ...مش كل مرة بقى
لو عايزيننى أضيف أى فقرات أو أغانى أو عندكوا أى اقتراحات للحفلة ابعتولى عشان ده بيهمنى جدا
شكرا
11 comments:
بإذن الله المرة دي مش تفوتني واجيب صديقتي الصدوقة ونحضر الحفلة المرة دي ان شاء الله .. بالتوفيق بإذن الله ..
مصطفي يا مصطفي
فاكرني
انا مصطفي يا مصطفي
ان شاء الله هجي واحضر الحفلة ده كمان
بس عاوزين حاجه جديدة مطرقعه
عاوزين نسمع حاجه جديدة ليك يا مصطفي
عارف بقا يا مصطفي لواعلانك دا دخل سلينترو و الكتب خان علي فكرة كافيه خطير ومميز ومش اتعمل قبل كذا
انتريديا
الكافيهات دي جامدة يا مصطفي وبيقعد فيها ناس من المستوي الراقي اووي والمثقفين لو اتعمل اعلان الحفلة بتاعتك ونزل هناك هتبقي حركة جامدة
علي فكرة انا كنت في الكتب خان ولقيت اعلان لحفلة لفرقة وسط البلد بتاعت الساقية
بعدين الميعاد 14 ولا واحد وعشرون
انا شوفته كان 14
من يومين
بالتوفيق بإذن الله
منتظرك يا عاشقة القمر انت وكراكيب و مها ميهو
مصطفى
الحفلة 21 مارس مش 14 أنا غيرته
ممكن تبعتلى اقتراحاتك والأماكن اللى انت بتقول عليها كلها بالتفصيل على الميل
elwaad2002@hotmail.com
هو انت مصطفى فتحى؟؟؟؟؟؟
يا سيد مصطفى محمود.. أنا كمان إن شاء الله مش هتفوتني الحفلة.. ده أنا حتى عملت ريماندر على الموبايل..
بس سؤال.. إنت هتنزل ألبوم جديد إمتى؟
صحيح يا مسيو مصطفي انت هتنزل الالبوم قريب ولا لاء
سمعت بيقولوا الالبوم وفيديو وكمان اغاني اطفال
بس مش شوفت حاجه
سلام
بصوا يا جماعة
انا بنتج شرايط سنين طويلة وبخسر فيها خسارة مادية فادحة فبينى وبينكوا انا قررت إنى مش هخسر تانى
يعنى مش هنتج شرايط بنفس آلية الإنتاج والتسويق اللى كنت ماشى بيها
أنا ببحث بقالى فترة كبيرة عن منتج ينتجلى أعمال فنية بشكل وبآلية وبحجم محترم ويحققلى اللى بحلم بيه
يعنى...
بقالى كتير ماشى فى الموضوع ده والمسألة قربت جدا
ازيك يا درش .. واحشنا ياراجل
بقولك صحيح .. مفيش اعلان فى الساقيه عن الحفلة ولا البرنامج الشهرى ياريت تتاكد من ده بنفسك لاحسن يكون فى حاجه غلط
عموما غلط او مش غلط انا ليا عندك طلب صغنن
ياريت الحفلة دى تغنى حاجه اول مرة تغنيها من اغانيك زى مثلا الاغانى اللى فى شريط بعد الصمت وقاوم وثورى كمان انها مناسبه جدا فى الوقت ده وكلماتها جميله جدا
الاقتراحات التانيه جايه فى الطريق ..انتظرنى
ايه البرجرمر بتاع الحفلة
وازاي اقدر احجز تذاكر
وانا بسمع عن الساقية بتاعت عبد المنعم الصاوي بس ايه طريقها من مصر الجديدة
ومفيش حفلات تاني قريب
ساقية الصاوى تحت كوبرى الزمالك فى الزمالك طبعا
ولو انت خطفت رجلك لحد برة عالمدونة هاتلاقى لينك موقع الساقية ادخل وهتعرف كل حاجة عن الساقية
بالنسبة للتذاكر تقدر تجيبها يوم الحفلة من على الباب
البرنامج بقة عبارة عن بعض أغانى فى حب النبى صلى الله عليه وسلم وعن الأم
بالإضافة للأغانى الخاصة بيه اللى قدمتها فى ألبوماتى
darsh enta magebtsh esmy khales fe elmawk3 beta3ak ma3a eny ma7ata mohema fe meshwarak elfanyy .aywa ya darsh e3teref .. we mat2olesh
ma7ata de teb2a el7aga ...konsha ya darsh beymasyyy
Post a Comment