19-1-2008
حفلة ساقية الصاوى
لو عايز تسمع أغانى وأشعار حلوة و بتتكلم فى مواضيع كتير ومتنوعة ويجمع ما بينها كلها إنها هادفة وبناءة وبتناقش قضايانا وهمومنا(ايه الكلام الكبير اللى أنا بقوله ده؟)...اسمع كلامى تعالى
تعالى ومش هتندم وهاتلاقى كذا نوع مزيكا شرقى وغربى كمان.
وكمان بنحتفل بعيد ميلاد فريق الوعد(اللى مكسر الأفراح تكسير) العاشر يعنى احتمال ينوبك حتة تورتة فى الهيصة أو إزازة كاكولا والتذكرة مش غالية.. ايه يعنى عشرة جنيه تدفعهم فى حفلة زى ده , ده أقل كومبو عند مؤمن بـ14 جنيه يعنى احنا ماجبناش كومبو حتى ,والكومبو بتاعنا شامل حتة التورتة والكاكولا كمان ياااالا يا عم
أنا عارف إن المعاد ناس كتير مستغلسينه عشان مش هايكونوا خلصوا امتحانات بس معلش ندوس على رغباتنا ونتحدى الظروف ونضحى ونحط إدينا ف إدين بعض ونعدى ببلدنا لبر الأمان (أمان إيه مش عارف) عامة ده نصيحة منى وعقلك فى راسك يابن الناس تعرف خلاصك
مصطفى محمود
ده كان الكلام المطبوع فى فلاير الدعاية بتاع الحفلة بتاع الساقية
ناوى أعمل إيه فى الحفلة
هاحاول المرة ده أعمل تغيير فى البرنامج على أد ماأقدر..زى إيه؟
أولا : هازود مساحة الفقرات الشعرية( اللى هو الشعر مش الشعرية أخت لسان العصفور وانا معتبرهم اخوات عشان بحبهم بالشوربة موت) فى البرنامج وهاستضيف شعراء يقولوا شعر وزجل على رأسهم طبعا أخوية وحبيبى صلاح جلال وهاحاول أستضيف شعراء تانيين زى جمال بخيت وعلى سلامة ووحيد الدهشان وسمير الدهشان(اللى همه مايقربوش خالص لبعض) وأنا كمان هاقول شعر لأنى بحبه جدا وبحس إنه لا يقل إمتاعا عن الغنى بالنسبة للناس ولى طبعا
ثانيا : ناوى إنى أغير فى الأغانى ,هاغنى أغانى من ألبوماتى ماغنيتهاش قبل كده زى "ضمير العالم" و "تعالوا نحلم" , كمان هغنى أغانى مش بتاعتى و بتاعة مطربين أنا بحبهم واتأثرت بيهم زى سيد درويش,محمد منير,إيمان البحر درويش, وجيه عزيز.
ثالثا : ناوى أقدم كذا صوت وموهبة من فريق الوعد والنورس وناس تانية واعمل كذا فقرة مش أنا اللى بغنى فيها
وطبعا طبعا هانحتفل بعيد ميلاد فريق الوعد العاشر ,آى والله العاشر يا رجالة وهانجيب تورتة ونطفى الشمع ونعمل شوية حركات جامدة وهابى بيرث ديى تو يو فريق الوعد
طبعا عارف إن الوقت مش هايكفى نعمل ده كله إنما يااااااااااا مسهل
انتوا عارفين إننا بنعمل اللى علينا والباقى على 12 شهر ....وده طبعا عشان كله على ربنا مش زى الناس مابتقول
أنا خلصت
أنا خلصت
وخلوا بالكوا إن آرائكو وتعليقاتكو مهمة جدا بالنسبة لى فماتحرموناش منها
السلام عليكم
17 comments:
انا كان نفسى احضر الحفله بس عندى امتحان تانى يوم على طول
خير الحمد لله
ان شاء الله تكون حفله جميله و ناس كثير تحضر
بالتوفيق يا آنسة مروة
السلام عليكم ورحمة الله
كل سنة وفريق الوعد بخير ... وعقبال ما تحتفل بالمائوية إن شاء الله .. وهو فعلاً فريق مكسر الدنيا
وربنا يوفققك في الحفلة اللي كنا مستنينها من زمان وإن شاء الله حتطلع حفله جامده مووووووووووت .. وياريت تقدر تصورها علشان محبيك اللي مش حيقدروا يحضروها علشان الإمتحنات وللا مسافرين بره يقدرو يشوفوها
وانت بكل خير
إن شاء الله هنصورها
الحفلة اللى جاية فى الساقية فى شهر مارس
طبعا انا فوجئت انك عامل مدونة الف مبروك عليها وكل سنة وفريق الوعد بخير ويارب فى تقدم مستمر واتشرف ان كنت من اعضاء الفريق من عشر سنين وربنا يوفقك يا درش
أخوك احمد صبحى
في الاول الف مبروك علي المدونه
وعقبال ما تشغل موقع الوعد
ثاني حاجه فكره الحفلات دي جميله فعلا اتمني انك تستمر فيها ان امكانيات صوتك تتوجه لكده افضل من الافراح بكتير
علي العموم مش هقدر برضه اني احضر علشان بره مصر بس اكيد اتمني اشوفها فيديو ياريت تبقي تصورها و ترفعها علي يوتيوب
بالمناسبه الصوره اللقطه حلو بتاعت البروفايل بس اتجاه عينك مش حلو مطلعاك احول شويه ياريت تتصور صوره غيرها
:)))))
واخيرا كان معاك كام واحد في تجاره اسمهم عبدالله
:)
سلام
أحمد بن صبحى هنا
يا مرحبا يا مرحبا
واحشنى يا راااجل
نتشرف بزيارتك يا باشا
إوعى التكنولوجيا يا معلم
-------------------------
مرحب بيك يا عبد الله
فكرنى بيك
هاننظر فى أمر الصورة
ربنا يوفقك يا استاذ صاصا
شكلك اتغير خالص بصراحة:)
بس ان شاء الله يارب دايما تكون احسن و اجمل
انا برضه مش هقدر و الله اجي عشان الامتحان
لكن انا ذهلت بصراحة لما عرفت انك عامل مدونة
على كل حال ربنا يوفقك و منتظرين جديدك يا فندم
سلامو
ممممممم
ان شاء الله نحاول نحضر الحفلة
انا واحدة متخرجة ومش ورايا امتحانات بقى
سعدت جدا بزيارة المدونة يااستاذ مصطفى كده النقد يبقى عيني عينك مش محتاجين ابو البراء يوصله :)
بالتوفيق ان شاء الله والله المستعان ونحضر الحفلة باذنه تعالى
دمتم بكل خير
الله؟؟
دانت مستحلفالى بقة
عامة تنورى الحفلة والمدونة
ربنا يوفقك في الحفلة دي ان شاء الله وانا بأيد رأي الأخ عبدالله بخصوص رفع الحفلة على النت عشان اللي ميقدرش يحضر ..والأفضل تتصور ديجيتال مش كاسيت عشان الجوده تبقى تمام
تحياتي وتمنياتي بالنجاح الدائم والمستمر ..
مبارك المدونة .. ودخول حضرتك فى عالم التدوين
وان شاء الله تكون الحفلة موفقة
الله يخليكى خليها
مبروك,الله يبارك,أى حاجة تانية غير مبارك دى
ثانيا هو عالم التدوين ده غير العالم بتاعنا؟؟؟؟
يعنى فيه ناس تانية عايشين ع الأرض غيرنا؟؟؟
دانا كنت فاكر ان احتا لوحدنا
يانهااااااااار
عامة..الله يبارك فيكى يا اسماء
نورتى المدونة
السلام عليكم
ماشاء الله ،، عرض هايل
جزاكم الله خيرا ، وجعل أعمالكم خالصة لوجهة الكريم
لكن زي ما ذكرتم مسألة الإمتحانات دي مأثرة شوية
أسألكم الدعاء
لكن أدعو الله لكم وللفرقة الرائعة بمزيد من التقدم إن شاء الله
رزقنا الله وإياكم الإخلاص في القول والعمل
على فكرة ،، فكرة المدونة جميلة جدا
انا كنت موجود في حفلة 2005 في الساقية لحضرتك
وكانت رائعة
والحضور كان ضخم جدا ما شاء الله
و ان شاء الله هجي الحفلة يوم السبت
ممكن حضرتك تنزل أغنية اه يا جامعة النور عشان بحبها أوى
على فكرة انا قابلت حضرتك السنة اللى فاتت في واحة عمر
فكرني؟
وغنتها هناك؟؟؟
تشرفينا يا أستااذة منة
ويا جامعة النور...حااااضر
انا مفيش اخبار جديدة جاتلى من ساعة حفلة الصاوى
ولسه الاسبوع ال فات ايميلى ضاع منى غدر وخيانة
المهم حبيبى ده ايميلى الجديد راسلنى عليه وعايز اعرف اخر اخبار الوعد
mhmd.monir@gmail.com
وليه تعليق على صفحة لو صوتك حلو كان اولها هييييه وظهرت ييييه من غير الهاء ارجو المعذرة
Post a Comment