سلسسلة المطاعم المعتمدة من الحوافريت

أبو رامى

طعم ووزن للكيلو ماحصلش لكن خدمة ...لامؤاخذة زبالة

فلو انت من اللى بيفرق معاك موضوع الخدمة والمعاملة

والكلام الفارغ ده خليك بكرامتك واوعى تعدى من قدامه

المكان : المدبح القديم , أمام مستشفى السرطان الجديد ومسجد "الرواس" ..بتاع الشيخ رجب حبيب قلبى الله يبارك له

المأكولات : هما تلت أربع أنواع لحوم مافيش غيرهم ,كباب وكفتة ونيفة وموزة ,وبالمناسبة ممنوع تطلب عنده كباب لوحده وبيحط مع الكباب والكفتة سجق كده.. غلاسة وهو ده النظام ...وهتضرب

الأسعار : آخر مرة قبل مايجدد كان بـ 90 جنيه الكيلو والموزة هتطلع بـ 40 جنيه تقريبا

لكن عنده اختراع كده سندوتش كفتة بـ 10 جنيه بس جامد جدا ومليان ومعاه علبتين سلطة و كمان تاخده "تيك أواى" يبقى استفدت بالأكل وما قعدتش و تلقيت خدمة أقل ما يقال عنها إنها نموذج لاستعباد الإنسان المصرى لأخيه اللى هو الإنسان المصرى برضه

نبذة مختصرة عن المطعم : بص بقه... أبو رامى ده يجمع مابين متناقضات فظيعة جدا

أولا أميز حاجة عنده إن وزن الكيلو تحس إنه كيلو ونص من بتاع أى كبابجى تانى خلقه ربنا وده يثبتلك إنه أكيد أبو رامى مش بيموووت فينا وبيمسى على كل واحد يخش عنده ويطلب كيلو كباب وكفتة بنص كيلو تحية من جيبه اللى تلاقيه هايفرقع من كتر الفلوس ..ليه ده تلاقيه فرقع فعلا و من زماااان كمان

ده طبعا يثبتلك إن الكبابجية التانيين بيشتغلوا الناس أعظم اشتغالة فى التاريخ المصرى الحديث واحن اللى كنا فاكرين إن الكيلو عندهم بخيره لكن فضحهم عم أبو رامى

أما عن الطعم فى أبو رامى فماقوللكش ..أصصصصلى

نيجى بقة لكارثة أبو رامى وهى الخدمة والمعاملة ...يا سيدى كل اللى عند أبو رامى من أول رامى سخصيا لحد أصغر عيل هناك مشتركين فى نفس الصفات

مكشرين فى وشك متواصل

مالهمش فى أبسط مبادئ الخدمة والضيافة

تنادى عليه يجيلك بعد أسبوعين ده إذا جه

ييجى جايبلك الحساب وهو كاتبه على ضهر ورقة كرتونة معفنة م الشارع وهو عايز يقوللك هاتدفع وهاتضرب وياعينى لو فكرت تناقشه فى الحساب تبقى ليلة ....طين

شكلهم وحش ولبسهم وحش ولابسين شباشب وبنفس اللبس م السنة للسنة

والله يا جماعة أنا مرة ناديت على رامى بذات نفسيته(اللى هو إبن أبو رامى ...شوف ازااااى؟) وقلتله
هو انتو ليه بتعاملوا الناس كدة؟ أنا المفروض إنى جاى آكل فى محل كباب وكفتة يعنى هادفعلى متين تلتميت جنيه أنا واللى معايا يعنى لازم أتعامل معاملة كويسة

تخيلوا رد علية وقاللى ايه
قاللى : وإيه يعنى يابيه ميتين تلتميت جنيه؟؟ هى دى فلوس يا بيه؟؟

فمن ساعتها وانا عرفت إن المحل ده "هوبلس كيس" لأن إذا كانت ده وجهة نظر رامى إنك ما تستحقش تتعامل عدل إذا مافيش أمل

إحقاقا للحق كل اللى بحكيهولكو ده من فترة وهو جدد رمضان اللى فات واتمنى إنه يكون إتغير وبدأ يعامل الناس بآدمية

وإلى اللقاء فى مطاعم أخرى

القاهرة

هاو هاو-البرنس-ماى كوين-فرغلى-أشرف فرغلى-المدينة-حضرموت-بحة-زيزو-شافعى-رضوان-الشيف-الجحش-البغل-أم هاشم-المشتهرى-الكرنك-حامور-وادى النيل-جاندوفلى-صبرى-مؤمن-شلبى

الإسكندرية

بلبع-عروس البحر-أبو ناصر-حمدى-عبد الوهاب-سيد صواريخ-حودة الجندل-شعبان بتاع السمك اللى بيقولو عليه

(كل ده إسمه على فكرة)

منتظر تعليقاتكو