Wednesday, February 27, 2008

بتغنى..صوتك حلو...بتعزف أى آلة موسيقية..تعالى


السلام عليكم ورحمة الله وبركاته

أيها الفنانين والفنانات

الموضوع ببساطة شديدة إنى أنا طول عمرى بيجيلى وبتعرف على شباب مواهب كويسة جدا وبكون نفسى أوجد لهم سكة ينموا فيها مواهبهم ويمارسوا فيها الفن بشكل محترم وللأسف مش بالاقى كتير اقتراحات اقترحها عليهم

وفى نفس الوقت نفسى أعمل عمل مفيد للشباب الموهوبين دول ومفيد للمجتمع اللى محتاج يستمتع بالمواهب دى وبشكل محترم واكون بكده بساعد على احياء الفن الهادف أكتر واخرج كوادر شباب موهوبين كل واحد يشق طريقه فى الفن بعد كده زى ماهو عايز

المهم

انا بكون فريق إنشاد دينى الإنشاد الدينى بمفهومه الواسع واللى عايز يفهم قصدى إيه يسمع أغانيه وهو يفهم وجهة نظرى

المهم الفريق ده هيكون فريق كبير يعنى يستوعب أكبر قدر ممكن من الشباب(واحتمال البنات لسه بفكر)الكبار والصغار

الفريق هيكون تطوعى صرف يعنى اللى هيشترك فيه مش هاياخد أى أجر(فلوس يعنى إنما أجر ربنا محفوظ طبعا)وهنبدأنعمل بروفات ونتدرب وبعد كده أنظملهم حفلات ونعرض فى أماكن كتير

أنا بكتب بسرعة عشان مستعجل ...ماعلينا

إللى يحب يشترك يتصل بيه على تليفونى ده


0101008476


طبعا الإعلان ده للى بيغنوا واللى بيعزفوا أى آلة موسيقية....ياللا منتظر اتصالاتكوا

بالمناسبة أنا لسه ما قترحتش اسم للفريق اللى عنده اقتراح لإسم يبعتهولى

13 comments:

Anonymous said...

عمل عظيم ربنا يوفقك يا درش
انا هبعته لكل اللى أعرفهم عشان الفايدة تعم
جزاكم الله خيرا
بالمناسبة عاجبانى مووووت فكرة إشراك البنات فى الفرقة دى لإن أكيد فيه بنات كتير نفسهم يغنوا حاجة محترمة لكن مش بيلاقوا طريق لده
ربنا يوفقك يادرش

Anonymous said...

فكرة جمييييلة جدا...انا اعرف كتيير من الناس اصواتهم حلوة ونفسهم يلاقوا اللى ياخد بايدهم ويعلمهم وينمى عندهم الموهبة دى فعلا حاجه عظيمة

وزى ماتقول عبارة عن مدرسة لفن واسلوب معين لايصال رساله معينة وعظيمة
يعنى حاجه كده لحفظ النسل مش كده ولا ايه

بالنسبة لاشراك البنات فى الفرقة كويس بس اكيد مفيش اختلاط .... عموما هى حاجه مش الزامية يعنى مش شرط تعملها

فكر فيها وشوف بعدها الشرعى واتكل على الله

جينا لاسم الفرقة ايه رايك نسميها
فرقة مازجنجى ههههههه...

لا بجد ايه رايك لو نسميها فكرة ... ايوة فكرة تبقى فرقة فكرة
لو مش عاجبك الاسم ده نشوف تانى
سلام مربع ليك يا درش

صوت من مصر said...

بجد نفسى اتعلم اعزف على اى حاجه لانى بصراحه معرفش اغنى لانى عندى مشكله بس ممكن اعزف اطبل
بهزر طبعا
ربنا يوفقك يارب
بس ممكن اشتغل اى حاجه معاكم ولا مينفعش هههههههههههههه

Anonymous said...

صباحك سكر
احلي واروق صباح مع فنجان النسكافية والكريم باترك
لفنان بتاعنا
انت كلك علي بعضك كدة عاجبني وافكارك الجامدة دي
طبعا انا بقا داخل ارخم الصراحة
اصلي ولا بعرف اغني ولا صوتي حلو بس بغني شويا علي قدي كذا لما قاعد بسمع اغنيه وحاط السواند فى وداني وبندندن بقا ودايم يجوا يشتكوا يوقلوي ازعجتنا _ ما علنيا ولا بعزف اي اله موسيقية انا بعزف علي سطور المذاكرة والكتب وبعزف علي اوتار الصوتية و الشرايين والاوردة عند الناس

كلية طب يا ناس
وهتخرج قريب بتاع تلات سنين كدة
وهفتح عيادة " العنوان الدور اللى فوق بيتنـا في العمارة اللى فيها
الصيدليةايوة ايوة صح اسملله عليك
عند الجامع بالظبط
يعني العيان يجيي عندي باذن الله لما افتح الصيدلية وينزل عند يشتري الادوية اللى هبقي مظبط مع الصيدلي عشان اخذ فلوس من الادوية الغالية اللى هتكتبها للناس وبعدين فى الاخر هنزل اصلي واستغفر ربنا علي اللى بعمله
رغاي رغاي انا عارف معلش استحملوني

اومال جاي ليه بقا

انا عندي كام اقتراح هقولهملكم عن اسم الفرقة
بس ينوبني حته يعني
تيجو تغنو فى فرحي علي فكرة مش بفكر اتجوز بس بقا في فرقه ومش هدفع فلوس فنتجوز وخلاص وياريت تجيبوا العروسة معاكم

طبعا بهزر


اقتراحات اسماء الفرقة الجديدة
" فى الفن "
"سلاطين الطرب"
"جيان" دا اسم مدينه اندلسية قديمة
ويعني صوت العذب

" بالمقلوب "

المهم عاوزين فرقة جامدة كدة زي وسط البلد

فرقة تطرقع الدنيا وتعمل حفلات كتيرة ومجانية فى كل حته
عشان الناس تعرف بالفن الهادف والاناشيد الاسلامية

admin said...

السلام عليكم :)

فكرة مميزة وأنا ضد إشراك الفتيات في الإنشاد , وبرده في نفس الوقت مش ضد ذلك .. بس الإستفتاء بتاع الناس مش أساسي في الحكم على الموضوع , إنت تسأل ناس فاهمة زي الأستاذ عمرو خالد والدكتور يوسف القرضاوي ..وهما هيساعدوك في الحكاية دي أوي

أما بالنسبة لإسم الفرقة فأنا بقترح إسم كلمات .. أو كلمة أو لحن أو لو عايز إسم جامد بقى زي فرق الراب والكلام ده مثلا خليه M3 أو حاجة كده


تحياتي ,,

Anonymous said...

السلام عليكم ..

بداية أنا من أشد المؤيدين ليك و لفنك و لأفكارك ..

و كنت إنت و أغانيك - بعد فضل الله - ليك الفضل إنى أشبع ميولى الفنية لما قررت إنى ألتزم

و خطوة راااااااااائعة تجميع المواهب

و ليا نظرتين ...

1-كل الناس بتعانى من موضوع الاختلاط فى الجمعيات .. غمن ناحية مش قادر تترك الجمعيات دى لأن الخير فيها كتييييير و غالب .. و من ناحية متضايق من حدوث بعض التجاوزات .. فما بالك بهيئة - اللى هى الفرقة - شغلتها الأساسية هى اللعب على أوتار العاطفة .. ما هو هو ده الفن ..تحريك العاطفة سواء للصح أو الخطأ .. لكن أهو فى الآخر ... مشاعر فياضة ممنهجة .. فأنا هنا أولع إنذار !!!

2- تخيل حضرتك .. بدل ما صاحبى يروح حفلة شرين ولا نانسى .. أقوله .. تعالى يا واد ..هانروح حفلة تانية إسلامية ... و ابسط يا عم لأن فيها بنات برضو !!!!

مع احترامى للجميع .. و مع احترامى لاجتهاد أى حد من مشايخنا - على دماغى من فوق - أنا لا أرى فيها سمت إسلامى على الإطلاق ..
و بعدين لو بصينا للموضوع من ناحية "فقه الدعوة " - حسب ما أرى - الموضوع دعويا غير مناسب على الإطلاق ..

و أنا رغم إنى باعمل مزيكا أصلا .. و ناوى إن شاء الله تكون سكتى لخدمة الدين هى الفن الهادف الإسلامى "بشموليته طبعا " .. إلا إنى بصراحة ما اقدرش أبدا أعزم واحد أ،ا بادعوه لحفلة .. بيغنى فيها بنات !!
مع احترامى طبعا للأخوات اللى عندهم الموهبة دى .. ممكن يكونو فرقة للبنات ... زى ما حنان ترك مثلا عاملة كافيه للمحجبات - على ما سمعت يعنى - لكن حقيقى هاتبقى ضربة فى مقتل إنى آخد واحد مدعو لحفلة كده

طبعا مش عايز أتكلم عن إنو هايحس إن توجهاتى مش مجرد أخذ الأوسع من الفقه بدل من الأحوك .. إن الموضوع وسع مغايا فى الفقه لغاية ما مط و انقطع أصلا !!! ناهيك أصلا عن مقارنته بينى - أو بالأحرى- بين منهجى و بين منهج آخر يغلب عليه الأحوط من الفقه !!!

فأنا أرى ... إن دعويا ... الخساءر أكتر من المكاسب

اللهم قد بلغت !!!

m.monir said...

يييه السلام عليكم
ازيك يا فنان , كده ولا تسال ولا تبارك حتى هوا يعنى عشان انت ال احييت فرحى تقوم متباركليش
محمد منير معاك يا برنس
طبعا مش هقولك على امكانيات صوتى الجبارة
لانك سمعتنى اصلا كذا مرة واخرها وانا بغنى ف فرحى ؟؟؟؟؟؟؟؟ ههههههههه
الحمد لله المعازيم كانو مؤدبين اوى اوى واستحملونى ع الاخر
بقولك عشان مطولش انا عندى اقتراح وليه امنيه
الاقتراح انا نفسى ادرس واو اتعلم او اخد حتى فكرة عن المقامات الموسيقية والمصطلحات الغنائية ومعناها زى القرار والجواب والهارمونى وخلافه فليه متعملش باب ف المدونه تتكلم فيه عن الحاجات دىه
والامنيه ان انت عارف انى مش ف مصر دلوقتى بس لو كنت موجود كنت هكون اول المشتركين ف الفرقة الجديدة وامنيى ان اشارك باى طريقة اى وسيلة شوف انت وقلى وانا تحت امرك يا فنان
سلامى الحار ل علاء حبيب قلبى وكل الفرقتين
محمد منير

محمد العتر said...

السلام عليكم ورحمة الله وبركاته ...

بالفعل شخص عظيم لأنه قد خطر على بالك إفادة الموهوبين بإفادة الإسلام بالفن

بس أنا عندي اقتراح صغنطووووط وياريت تتقبله بصدر رحب

أنا.. يعني مش هقول على نفسي صوتي كويس ... بس هقول أنا بحب الإنشاد اللي هو يعني الغناء الملتزم .. بس علشان أنا صغير في سني يعني عندي 15 سنة فمكنش عندي فرصة أتعلم العزف على آلة موسيقية ...

فهل يمكن أن يتم الفصل .. يعني اللي صوته كويس يقدم وكذلك الذي يجيد العزف على آلة يقدم ....

إيه رأي حضرتك

so4mp3 said...

فكرة كويسة جداً والله، بيقولوا ان صوتي حلو

عجباوي للتجارة والتسويق said...

السلام عليكم ورحمة الله وبركاته
انا منشد منذ حوالي 20 سنة أو أكثر
عمري 33 سنة
عملت في فرقة إسلامية لأكثر من 12 سنة
أنا الآن أعمل في القاهرة ووقتي غير مناسب للعمل مع الفرقة حيث أناها بالمنوفية
أتمنى المشاركة مع الفنان المبدع مصطفى محمود مع فريق الوعد أو الفرقة الجديدة التي يكونها
كما أتمنى أن ترى موهبتي النور
وأسأل الله أن يعيننا على نشر الكلمة الطيبة والفن الراقي

Unknown said...

انا صوتى حلو ممكن اشترك معاكم

Unknown said...

انا صوتى حلو ممكن اشترك معاكم

اشتراك said...

انا صوتى حلو كنت شغال مع أ /ادهم سليمان ممكن اشترك .. ارجو ان حضرتك تبعتلى رقم حضرتك لان الرقم اللى ف الاعلان اتغير