Monday, December 24, 2007

إعتبروها افتتاحية



هذه المدونة لماذا

السلام عليكم ورحمة الله وبركاته
أحكيلكوا حكايتى مع النت والمدونات من أولها
أنا زمان ماكانش لي فى موضوع النت ده خالص لدرجة إن الميل كنت بافتحه كل فين وفين أما الماسنجر فكنت بكتب على الكى بورد بصعوبة جدا فكنت بستصعب أوى مسألة الشات ده وكانت الناس تقضل تقوللى إنت لازم يبقى عندك موقع وتكون متواجد ع النت عشان ده بقه مهم جدا
المهم .. موضوع الموقع ده حصل فيه حاجات كتير جدا فعملت كذا موقع لي وللشركة .. بس الحمد لله كلهم فشلوا وكان آخرهم من كام يوم بعد ماشتريت دومين
mostafamahmud.com
جيت أعمل الموقع بقه لقيت الأسعار بقت ناااااااار واللى كان السنة اللى فاتت بسعر السنة دى بضعف السعر تقريبا, فقلت لنفسى يااد "ليه تدفع أكتر لما ممكن ماتدفعش حاجة" :) على رأى "طارق نور"
blogspot وربنا يخلليلنا حاج بلوج سبوت
.. واهه يبقى ييجى الموقع براحته بعدين,الحقيقة ده كان السبب الأول
أما السبب التانى إنى من صغرى وانا بحب أعمل كل حاجة فنية بنفسى فأنا بعشق الفن بكل أشكاله وبهتم جدا بالتفاصيل الفنية ولقيت إللى أنا عايزه فى المدونة لأنى بعمل كل حاجة على مزاجى أشيل أحط أغير ألوان ألعب زى ما أنا عايز والحقيقة ده بيمثلى متعة كبيرة
وقدرا الفترة اللى فاتت لقيت نفسى إيدى مشيت فى التدوين فى مدونة تانية ولقيت استحسان على كتابتى من كل اللى حوالية فقلت ليه لأ؟
المهم أدينى بدأت وياااااااااا مسهل


المهم أنا بقى ناوى على إيه

أحط أغانى ,صور,أخبار حفلات وغيره
أناقش موضوعات فنية تخصنى وتخص غيرى من الفنانين
تكون المدونة ساحة للتواصل وتبادل الأفكار والرؤى مابينى ومابين الجمهور
أكتب خواطر عن مواضيع إنسانية تخصنى وتخص غيرى
أكتب عن أعمال فنية مطروحة فى السوق الفنى
أجمع إيميلات وأرقام موبايلات عشان أبعتلها دعاية الحفلات وغيره



ومن أوائل الموضوعات اللى هكتب فيها

من أنا؟
حكايتى مع الفن
لماذا تدهور شريط الفن الإسلامى فى مصر
أنا وصلاح جلال ..حكاية لازم تتحكى
أنا وعمرو خالد وصناع الحياة
عمو ياسر..عمو ياسر..إيا إيا أوووه
حكايتى مع الأكل الريجيم
شخصيات فنية حبتها وأثرت فية
فيلم "الجزيرة" عشرة على عشرة
خالد يوسف شكرا ع الآخر
حفلة ساقية الصاوى
أنا والوعد عشر سنين
مطاعم معتمدة منى شخصيا..جرب وادعيلى

مصطفى محمود

15 comments:

Anonymous said...

نورت التدوين ياباشا
ويشرفنى أكون أول التعلقيات فى مدونتك
وخطوه هايله للتواصل مع الناس
للأسف مش هعرف أحضر حفلتك فى الصاوى لانى
بالظبط قبلها بيومين هكون روحت الجيش !!!
فلو كده ممكن ننقلها مباشر هناك
وان شاء الله أشوفك قبل مسافر
محمد اسامه
:)

Anonymous said...

Mashallah ya bro, veeerrry nice. May Allah inshallah always grant you success, Amin. Attending your concert will also be hard to me, as it is a bit far. Will it be broadcasted in some satellite programme?

Allah ma3ak da2iman inshallah,
wassalam
Chalid Faraj

Anonymous said...

السلام عليكم
خطوة رائعه من فنان رائع .. بالتوفيق يارب :)

الرحالة

mostafa mahmud said...

كان لازم تكون أول أول المعلقين يا حمادة

هافتقدك موت فى الحفلة يا دفعة

بس لو عالجبل فى الجيش عندكوا هيكون فيه راديو ترانزستور
برضه مش هاتسمع الحفلة لأنها مش متذاعة


CHALID FARAJ

إن شاء الله الحفلة هاتتذاع فى قناة جديدة هاتفتح قريب




إزيك يا رحالة



إدعولنا يا جماعة
مستنيكوا فى الحفلة

مصطفى

Anonymous said...

خياااانة
انا يوم 31 الساعة 4.30 تقريبا دخلت على المدونة وماكنش حد معلق وكتبت تعليق جد جدا قلت فيه
اخي وحبيبي يسعدني ان يكون تعليقي اول تعليق وده مش غريب لاننا كتير في حياتنا بنكون اول من يهنئ واول من يواسي بعضنا البعض
وقلت كمان
ربنا يجمعنا على الخير في الدنيا وفي جنته في الاخرة
ودلوقت ادخل لا اجد التعليق لا لا لا دي خيانة
على العموم انا عارف ياصافي ان اللى في القلب في القلب
وربنا يوفقك في الحفلة
وياباشا اتقل وما تحرقش الفقرات قول بس كده حجات مشوقة وغامضة شغل تسويق يعني

الف بركة على المدونة والحفلة وعقبال ال بي ام
اخوك

mostafa mahmud said...

هى الشبكة امبارح كانت واقعة يا عمو معلش

ربنا يباركلك يابو عمار

أراك فى "البرنس" إن شاء الله يا عمو

ويسمع من بقك ربنا


مصطفى

Ahmed Al khashab said...

ايه الحلاوة دية يا مصطفى
انت عملت ايه يا راجل
ابقى قولى علشان عايز اعمل زيك
لوك جديد و جميل و يبقى عليك انطلاقة جامدة يا مصطفى

بالنسبة للحفلة يا مصطفى ميعادها وحش جدا
ده الكليات كلها هتخلص يوم ثلاثة و عشرين أو اربعة و عشرين يعنى الوقت مقتول موت

mostafa mahmud said...

مبدئيا أنا مش عارف أدخل المدونة بتاعتك يا khashab

معاد الحفلة غصب عنى عشان كده عامل واحدة تانية فى نفس المكان
فى أول مارس
إن شاء الله

Anonymous said...

ياريت لو تتسجل لو صوت بس وتترفع على موقع عشان اللي ميقدرش يحضر ..

بالتوفيق ..

Anonymous said...

أنا عارف إني اتأخرت كتيببببر
بس بردة واجب علينا نبارك ونهني
وخصوصا إن المدونة عجبتني بجد

HAMDY NASR said...

الف مبرو مبروك يعنى وإنشاء الله جين بس انت نست وعدك يا فنان فاكر فريق النو ر اللى هو من المنوفيه اللى انت قولت لهم انكم معايه فى الحفل الجيه نستهم مع إنهم بيعملو يونيفورم جديد وعندهم حاجات حلوه تانى يله لو فى فرصه ممكن ؟؟؟؟؟؟
الف مبروك يافنان وعقبال أول كلب عالمى أنشاء الله

mostafa mahmud said...

انا عند وعدى يا باشا

الحفلة اللى جاية ان شاء الله بعد شهر تقريبا من الأولى

خلينا على اتصال بعد الحفلة

عاشقة القمر said...

الف مبروك على المدونة وبجد عسولة جدا وشيك اوي ما شاء الله .. وبإذن الله تكون من أجمد المدونات .. وبالنسبة للحفلة فهي فعلا مشكلة بالنسبة لمواعيد الامتحانات بس مادام فيه واحدة تانية في مارس يبقى تمام وفرصة جامدة لينا أصحاب المرض قصدي أصحاب الامتحانات .. والف مبروك مرة تانية على المدونة ..

Anonymous said...

nice concert gazakom allah 7'iran , 3mr khaled attendence wew great .. and the songs ,the band and your performance were great too .. happy birth day el wa3d alwayes in progress
and allah's plessings

samehhelaly said...

ايه يا مصطفى انا سامح هلالى بتاع الحريه انا انبسط لما شفتك على الفيسبوك و البلوج جامد ابقى زور البلوج بتاعى samehhelaly.blogspot.com
ابقى اتصل
0120316988
الحريه كلها فرحانه بيك