Saturday, December 29, 2007

حفلة ساقية الصاوى



19-1-2008
حفلة ساقية الصاوى
لو عايز تسمع أغانى وأشعار حلوة و بتتكلم فى مواضيع كتير ومتنوعة ويجمع ما بينها كلها إنها هادفة وبناءة وبتناقش قضايانا وهمومنا(ايه الكلام الكبير اللى بقوله ده؟)...اسمع كلامى
تعالى
تعالى ومش هتندم وهاتلاقى كذا نوع مزيكا شرقى وغربى كمان.

وكمان بنحتفل بعيد ميلاد فريق الوعد(اللى مكسر الأفراح تكسير) العاشر يعنى احتمال ينوبك حتة تورتة فى الهيصة أو إزازة كاكولا

والتذكرة مش غالية.. ايه يعنى عشرة جنيه تدفعهم فى حفلة زى ده , ده أقل كومبو عند مؤمن بـ14 جنيه يعنى احنا ماجبناش كومبو حتى ,والكومبو بتاعنا شامل حتة التورتة والكاكولا كمان ياااالا يا عم

أنا عارف إن المعاد ناس كتير مستغلسينه عشان مش هايكونوا خلصوا امتحانات بس معلش
ندوس على رغباتنا ونتحدى الظروف ونضحى ونحط إدينا ف إدين بعض ونعدى ببلدنا لبر الأمان (أمان إيه مش عارف) عامة ده نصيحة منى وعقلك فى راسك يابن الناس تعرف خلاصك

مصطفى محمود
ده كان الكلام المطبوع فى فلاير الدعاية بتاع الحفلة بتاع الساقية

ناوى أعمل إيه فى الحفلة



هاحاول المرة ده أعمل تغيير فى البرنامج على أد ماأقدر..زى إيه؟

أولا : هازود مساحة الفقرات الشعرية( اللى هو الشعر مش الشعرية أخت لسان العصفور وانا معتبرهم اخوات عشان بحبهم بالشوربة موت) فى البرنامج وهاستضيف شعراء يقولوا شعر وزجل على رأسهم طبعا أخوية وحبيبى صلاح جلال وهاحاول أستضيف شعراء تانيين زى جمال بخيت وعلى سلامة ووحيد الدهشان وسمير الدهشان(اللى همه مايقربلوش خالص) وأنا كمان هاقول شعر لأنى بحبه جدا وبحس إنه لا يقل إمتاعا عن الغنى بالنسبة للناس ولى طبعا





ثانيا : ناوى إنى أغير فى الأغانى ,هاغنى أغانى من ألبوماتى ماغنيتهاش قبل كده زى "ضمير العالم" و "تعالوا نحلم" , كمان هغنى أغانى مش بتاعتى و بتاعة مطربين أنا بحبهم واتأثرت بيهم زى سيد درويش,محمد منير,إيمان البحر درويش, وجيه عزيز.


ثالثا : ناوى أقدم كذا صوت وموهبة من فريق الوعد والنورس وناس تانية واعمل كذا فقرة مش أنا اللى بغنى فيها

وطبعا طبعا هانحتفل بعيد ميلاد فريق الوعد العاشر ,آى والله العاشر يا رجالة وهانجيب تورتة ونطفى الشمع ونعمل شوية حركات جامدة

وهابى بيرث ديى تو يو فريق الوعد

طبعا عارف إن الوقت مش هايكفى نعمل ده كله إنما يااااااااااا مسهل
انتوا عارفين إننا بنعمل اللى علينا والباقى على 12 شهر ....وده طبعا عشان كله على ربنا مش زى الناس مابتقول

أنا خلصت
وخلوا بالكوا إن آرائكو وتعليقاتكو مهمة جدا بالنسبة لى فماتحرموناش منها

السلام عليكم


مصطفى

13 comments:

الكواكبي said...

طبعاً يشرفني اني اكون اول واحد يعبرك ويعدي يبص في المدونة الصحراوي دي

على اي حال احب اقول لك ان الجريمة لا تُفيد

العسكري عتريس said...

ألف مبرووووك بجد على عيد ميلاد فرقة الوعد

تاني حاجة الف مبروووك على المدونة

تالت حاجة انا هحاول ان شااااء الله اجي الحفلة بالرغم من الامتحانات

رابع حاجة غلسه شوية .. دي تدوينة عندي كاتب فيها عن واحد بيقطع عليك ولاعب في كام انشودة من بتوعك
http://3atris.blogspot.com/2007/04/blog-post_12.html
ههههههههههه

Ahmed Al khashab said...

على فكرة يا على (عتريس) الواحد المقطع عليه كان مفهمنى أنه قايل لـ مصطفى
على التوزيعات الجديدة اللى عاملها له
و قالى أنها عجبت مصطفى

أنا والله نفسى أجى يوم الحفلة بس عندى امتحانين بعدها مهمين جدا

على فكرة يا مصطفى أنا اللى قايل لـ على (عتريس ) على مدونتك
أى خدمة
هههههههه

إحنا said...

كان نفسى أحضر أتمنى
وأحب تعمل تنزيل للأغانى القديمة وتقولنا عن الشريط الجديد وأتمنى أغانى أفراح كلها هادية

mostafa mahmud said...

أولا أنا سعيد جدا بتواصلكوا معايا

ثانيا محمد يونس فعلا سمعنى التوزيعات وعجبتنى جدا

واحب اقوللكوا إن محمد ده هايكون موزع جامد جدا فى المستقبل إن شاء الله

أخيرا مستنيكوا فى الحفلة

mostafa mahmud said...

هايكون كل اللى انت قلت عليه موجود يا جهاد إن شاء الله

Anonymous said...

سلام عليكم

المدونة جميلة جدا ، وهى مهمة فعلا لأسباب كتييرة ، مش عشان الناس كلها عندها مدونات ، ولكن عشان هى بديل للموقع زى ما قولت ، ممكن تحط فيها أغانيك وأغانى ناس تانية ، ولقطات من حفلاتك ، وآخر أخبارك والبوماتك ، ويومياتك الطريفة ، وعجبنى جدا موضوع استطلاع الرأى ده لإنه هايجس نبض جمهورك اللى هو أساس شغلك .

الحاجة التانية ، موضوع الحفلة ، كنت باقترح إنك تحاول تستغل الحفلة وتواجد الجمهور فى الدعاية ليك ، مثلا ممكن توزع شرايط لك على الجمهور كهدية ، وتضرب بيها عصفورين بحجر ، تقرب الجمهور منك ، وفى نفس الوقت تعرف اللى ماسمعش عنك أو مايعرفكش بأغانيك

ياريت كمان لو ينفع تعمل مكان بسيط فى الساقية لمنتجاتك وشرايطك باسم فرقة الوعد وصورتك فى بنر كبيييييير ويقف على المعرض ده واحد أو اتنين من الشباب .

وفى حاجة أخيرة ، ياريت ماتكترش الفقرات ، أصل أنا حسيت إن الفقرات اللى قولت عليها كتيرة جدا على الوقت ونصيحتى إنك تحدد هدفك من الحفلة :
هل عايز بشكل أساسى تغنى أغانيك وفنك ؟
ولا جنب ده عايز تعرض مواهب ناس تانية ؟
ولا حابب تعرض فقرات شعرية ؟
ولا تقول الأغانى اللى قريبة منك - زى ما قولت جنب أغانيك ؟

يعنى ممكن تختار حاجتين من دول او تلاتة بالكتيير


ياريت تحدد هدفك عشان تحاول تحققه بكل جهدك ، وكمان عشان تعرف تقيس عليه بعد الحفلة وتعرف إنت نجحت ولا لأ ؟

معلش طولت عليكم

mostafa mahmud said...

يا سارة

أولا بجد جزاكم الله خيرا

كل آرائك فى الحسبان


سعيد بالتواصل معاكى

ماتحرميتاش من آرائك

ثانيا فييين ميييييلك؟؟؟؟

الكواكبي said...

انت مالك بميلها يا عم انت!! احترس نفسك

mostafa mahmud said...

والله يا إسلام أنا بجمع الميلات عشان أبعت ميلات
دعاية


بس ليك علية من النهاردة مش هاقول لحد هات ميلك


بالذات لو واحدة


هه استريحت؟؟؟

الكواكبي said...

تشكر يا برنس

mohammed alsha3r said...

ايه النور دا
منورعالم التدين يافنان

امابقى بالبنسبه لموضع الحفله

ان شاء الله انا من أول الحاضرين

وهننقل لك الحفله صوت وصورة لكل مواقعنا على النت

ياريت لو تشرفنى فى المدونه

انا كنت منزل لحضرتك بوست عن اغنيه كنا بنحلم نبقى كبار

كتير عجبتى

منور يافنان

Anonymous said...

عزيزى السيد / مصطفى محمود
بعد التحيات والسلامات وكل البدايات
بجد نفسى الحفلة دى تطلع جامدة موووووت
وعشان كده أنا عندى ليك اقتراحان فى
غاية الأهمية (إوعى تهمل واحد منهم ) ا
الأول : حتة اسكتش صغير كوميدى يفطس الناس على روحهم من الضحك
الثانى : إنك تغنى أغنية جامدة جدا من
الأغانى اللى أنا مقلفها , واللى
بإذن الله حتكسر الدنيا وتخلى كل الناس تسأل عن الألبوم الجديد اللى فيه الأغانى دى حينزل إمتى
mr_samehzaki@yahoo.com