Wednesday, January 30, 2008

فيديو الحفلة


ده أول فيديو يوصلنى للحفلة

إهداء من الفقير إلى الله


وقوللى رأيك


Tuesday, January 29, 2008

بنحبك يا أبو تريكة


بنحبك يا أبو تريكة



نادي الهلال بغزة اقام احتفالية تحت عنوان بنحبك يا ابو تريكة احتفاءا بالنجم محمد ابو تريكة ردا علي رفعه لقميص ابيض مكتوب عليه جملة تعاطف مع أهل غزة

دول اطفال غزة شايلين لوحات تأييد لابو تريكة

Thursday, January 24, 2008

إهداء


"قصة زهرة "

أشعار المبدع صلاح جلال


من ألبوم قلب كبير


Monday, January 21, 2008

الدفعة الأولى من الصور

علاء فؤاد يقدم الحفل

علاء فؤاد,.وجدى العربى,أنا و صلاح جلال

كلمة الأستاذ وجدى العربى

happy birthday 2 u

المنشد حسن كمال
الأستاذ وجدى العربى يشاركنا الاحتفال

احمد عز يغنى مشوار الألف ميل

صلاح جلال يمتع الجمهور

الشاعر الجميل : صلاح جلال

الجمهور

الشاعرة : زينات القليوبى تلقى قصيدة لرائعة فى حب النبى صلى الله عليه وسلم


المنشد سامح البيه

الأستاذ عمرو خالد والأستاذ وجدى العربى
و علاء فؤاد
الاستاذين وجدى العربى و عمرو خالد

بيطحنوا فى التورتة...البلاستيك

ودى كمان تغطية تغطية وشوية صور حلوة شوفوها
http://alsha3r.blogspot.com/

الفيديوهات والصوتيات بكرة إن شاء الله

Sunday, January 20, 2008

أدخل حالا وقوللى رأيك فى الحفلة


أدخل حالا وقوللى رأيك فى الحفلة بالتفصيل الممل
ده إذا كنت حضرت
أما لو ماكنتش حضرت ....فاستغفر ربنا يابنى وانوى نية صادقة على حضور الحفلة إللى جاية فى الساقية فى أول مارس إن شاء الله
الصور والفيديوهات والأغانى بكرة ان شاء الله لأنى راجع مييييييييت ولازم أناااام واشبع نووم
السلام عليكم ورحمة الله وبركاته

Monday, January 7, 2008

أن أن آآآآآآن..إعلان الحفلة



www.mostafamahmud.com


www.elwaad.com


يعنى هنكون ممنونين لوحد يعنى خد الحتة دى "كوبى بيست" عنده فى مدونته,موقعه,على حيطة بيتهم أى حتة والسلام..يعنى هتكون مساعدة من الإنسان.. لأخوه اللى هو الإنسان برضه (زميله فى البشرية يعنى) ولاهى الإنسانية إنعدمت فى الزمن ده..تخيل تساعد المحتاجين بــ "كوبى بيست" إيه الحلاوة والبساطة دى؟؟


ياللللا يا حبيبى


ياللللا يا بابا..شكة دبوس


كووووووبى....بييييييست....هييييه شفت بسيطة ازاى....حسيت بحاجة...شطووووور


تشكر يا ذوق يا أمير يابن اللللل أمرا..ماتخافش نسبتك محفوظة..فى الثواب ماتفهمنيش غلط

Sunday, January 6, 2008

Thursday, January 3, 2008

حفلة ساقية الصاوى



19-1-2008
حفلة ساقية الصاوى


لو عايز تسمع أغانى وأشعار حلوة و بتتكلم فى مواضيع كتير ومتنوعة ويجمع ما بينها كلها إنها هادفة وبناءة وبتناقش قضايانا وهمومنا(ايه الكلام الكبير اللى أنا بقوله ده؟)...اسمع كلامى تعالى

تعالى ومش هتندم وهاتلاقى كذا نوع مزيكا شرقى وغربى كمان.



وكمان بنحتفل بعيد ميلاد فريق الوعد(اللى مكسر الأفراح تكسير) العاشر يعنى احتمال ينوبك حتة تورتة فى الهيصة أو إزازة كاكولا والتذكرة مش غالية.. ايه يعنى عشرة جنيه تدفعهم فى حفلة زى ده , ده أقل كومبو عند مؤمن بـ14 جنيه يعنى احنا ماجبناش كومبو حتى ,والكومبو بتاعنا شامل حتة التورتة والكاكولا كمان ياااالا يا عم



أنا عارف إن المعاد ناس كتير مستغلسينه عشان مش هايكونوا خلصوا امتحانات بس معلش ندوس على رغباتنا ونتحدى الظروف ونضحى ونحط إدينا ف إدين بعض ونعدى ببلدنا لبر الأمان (أمان إيه مش عارف) عامة ده نصيحة منى وعقلك فى راسك يابن الناس تعرف خلاصك


مصطفى محمود


ده كان الكلام المطبوع فى فلاير الدعاية بتاع الحفلة بتاع الساقية








ناوى أعمل إيه فى الحفلة


هاحاول المرة ده أعمل تغيير فى البرنامج على أد ماأقدر..زى إيه؟


أولا : هازود مساحة الفقرات الشعرية( اللى هو الشعر مش الشعرية أخت لسان العصفور وانا معتبرهم اخوات عشان بحبهم بالشوربة موت) فى البرنامج وهاستضيف شعراء يقولوا شعر وزجل على رأسهم طبعا أخوية وحبيبى صلاح جلال وهاحاول أستضيف شعراء تانيين زى جمال بخيت وعلى سلامة ووحيد الدهشان وسمير الدهشان(اللى همه مايقربوش خالص لبعض) وأنا كمان هاقول شعر لأنى بحبه جدا وبحس إنه لا يقل إمتاعا عن الغنى بالنسبة للناس ولى طبعا



ثانيا : ناوى إنى أغير فى الأغانى ,هاغنى أغانى من ألبوماتى ماغنيتهاش قبل كده زى "ضمير العالم" و "تعالوا نحلم" , كمان هغنى أغانى مش بتاعتى و بتاعة مطربين أنا بحبهم واتأثرت بيهم زى سيد درويش,محمد منير,إيمان البحر درويش, وجيه عزيز.



ثالثا : ناوى أقدم كذا صوت وموهبة من فريق الوعد والنورس وناس تانية واعمل كذا فقرة مش أنا اللى بغنى فيها



وطبعا طبعا هانحتفل بعيد ميلاد فريق الوعد العاشر ,آى والله العاشر يا رجالة وهانجيب تورتة ونطفى الشمع ونعمل شوية حركات جامدة وهابى بيرث ديى تو يو فريق الوعد






طبعا عارف إن الوقت مش هايكفى نعمل ده كله إنما يااااااااااا مسهل




انتوا عارفين إننا بنعمل اللى علينا والباقى على 12 شهر ....وده طبعا عشان كله على ربنا مش زى الناس مابتقول

أنا خلصت


وخلوا بالكوا إن آرائكو وتعليقاتكو مهمة جدا بالنسبة لى فماتحرموناش منها


السلام عليكم

سلسسلة المطاعم المعتمدة من الحوافريت


أبو رامى

طعم ووزن للكيلو ماحصلش لكن خدمة ...لامؤاخذة زبالة

فلو انت من اللى بيفرق معاك موضوع الخدمة والمعاملة

والكلام الفارغ ده خليك بكرامتك واوعى تعدى من قدامه



المكان : المدبح القديم , أمام مستشفى السرطان الجديد ومسجد "الرواس" ..بتاع الشيخ رجب حبيب قلبى الله يبارك له
المأكولات : هما تلت أربع أنواع لحوم مافيش غيرهم ,كباب وكفتة ونيفة وموزة ,وبالمناسبة ممنوع تطلب عنده كباب لوحده وبيحط مع الكباب والكفتة سجق كده.. غلاسة وهو ده النظام ...وهتضرب


الأسعار : آخر مرة قبل مايجدد كان بـ 90 جنيه الكيلو والموزة هتطلع بـ 40 جنيه تقريبا
لكن عنده اختراع كده سندوتش كفتة بـ 10 جنيه بس جامد جدا ومليان ومعاه علبتين سلطة و كمان تاخده "تيك أواى" يبقى استفدت بالأكل وما قعدتش و تلقيت خدمة أقل ما يقال عنها إنها نموذج لاستعباد الإنسان المصرى لأخيه اللى هو الإنسان المصرى برضه


نبذة مختصرة عن المطعم : بص بقه... أبو رامى ده يجمع مابين متناقضات فظيعة جدا
أولا أميز حاجة عنده إن وزن الكيلو تحس إنه كيلو ونص من بتاع أى كبابجى تانى خلقه ربنا وده يثبتلك إنه أكيد أبو رامى مش بيموووت فينا وبيمسى على كل واحد يخش عنده ويطلب كيلو كباب وكفتة بنص كيلو تحية من جيبه اللى تلاقيه هايفرقع من كتر الفلوس ..ليه ده تلاقيه فرقع فعلا و من زماااان كمان
ده طبعا يثبتلك إن الكبابجية التانيين بيشتغلوا الناس أعظم اشتغالة فى التاريخ المصرى الحديث واحن اللى كنا فاكرين إن الكيلو عندهم بخيره لكن فضحهم عم أبو رامى
أما عن الطعم فى أبو رامى فماقوللكش ..أصصصصلى
نيجى بقة لكارثة أبو رامى وهى الخدمة والمعاملة ...يا سيدى كل اللى عند أبو رامى من أول رامى سخصيا لحد أصغر عيل هناك مشتركين فى نفس الصفات
مكشرين فى وشك متواصل
مالهمش فى أبسط مبادئ الخدمة والضيافة
تنادى عليه يجيلك بعد أسبوعين ده إذا جه
ييجى جايبلك الحساب وهو كاتبه على ضهر ورقة كرتونة معفنة م الشارع وهو عايز يقوللك هاتدفع وهاتضرب وياعينى لو فكرت تناقشه فى الحساب تبقى ليلة ....طين
شكلهم وحش ولبسهم وحش ولابسين شباشب وبنفس اللبس م السنة للسنة
والله يا جماعة أنا مرة ناديت على رامى بذات نفسيته(اللى هو إبن أبو رامى ...شوف ازااااى؟) وقلتله
هو انتو ليه بتعاملوا الناس كدة؟ أنا المفروض إنى جاى آكل فى محل كباب وكفتة يعنى هادفعلى متين تلتميت جنيه أنا واللى معايا يعنى لازم أتعامل معاملة كويسة
تخيلوا رد علية وقاللى ايه
قاللى : وإيه يعنى يابيه ميتين تلتميت جنيه؟؟ هى دى فلوس يا بيه؟؟
فمن ساعتها وانا عرفت إن المحل ده "هوبلس كيس" لأن إذا كانت ده وجهة نظر رامى إنك ما تستحقش تتعامل عدل إذا مافيش أمل

إحقاقا للحق كل اللى بحكيهولكو ده من فترة وهو جدد رمضان اللى فات واتمنى إنه يكون إتغير وبدأ يعامل الناس بآدمية

وإلى اللقاء فى مطاعم أخرى
القاهرة
هاو هاو-البرنس-ماى كوين-فرغلى-أشرف فرغلى-المدينة-حضرموت-بحة-زيزو-شافعى-رضوان-الشيف-الجحش-البغل-أم هاشم-المشتهرى-الكرنك-حامور-وادى النيل-جاندوفلى-صبرى-مؤمن-شلبى
الإسكندرية
بلبع-عروس البحر-أبو ناصر-حمدى-عبد الوهاب-سيد صواريخ-حودة الجندل-شعبان بتاع السمك اللى بيقولو عليه
(كل ده إسمه على فكرة)
منتظر تعليقاتكو

Wednesday, January 2, 2008

من أنا

من أنا
sooooooooon
بالمناسبة سووون ده يعنى قريبا